عن الاكل ..المم..الطفح

عن الاكل ..المم..الطفح

لما ركزت في موضوع الاكل دا اتفجأت فشخ .....
احنا مش بناكل احنا بنفتري ..وربنا بنفتري ..حياه ناس (ساعات بيكونوا فقرا ) فيها اهمال و ساعات بذخ بدون داع...
خلينا كدا نتابع يوم الواحد العادي...نصحي من النوم نفطر ..وجبه الفطار دي اهم وجبه و كدهو بقا فاندوس اللي قدامنا (دا انتا بتتعب و بتشقي يبني , يبنتي) 
ننزل من البيت لو فيه بس خمس دقايق بدري من معاد الشغل نشقط فيهم حاجه من اقرب محل ساندوتشات او عربيه فول و لو مالحقناش ممكن نروح نفطر مع الناس في الشغل و ممكن نعمل كل دا مع بعض

بعد كده بقي نفضل نلقط (حاجات خفيفه كده) شويه باسكوتات علي شيبسيات "حانقعد بقنا فاضي يعني"

يجي الغدا ...احيه عالغدا..حد ركز في كميه الرز و المكرونه و العيش اللي بناكلها ..(بلاش اللي بناكلها ..اللي بتفضل و تترمي طيب ) طيب عدينا مرحله طبق الرز او المكرونه او الزربيون رغيف عيش (متخيلين كميه العجين اللي بينزل بطننا ) ينفع بذمتكو نقوم كده علي طول من غير ما نحلي (كل واحد عارف بيحلي بأيه...كيك,جاتوهات ,تورت ,مربي ,عسل بطحينه ,حلاوه بالقشطه ..انتو و ضميركو بقا ) مرحله الغدا دي بنقوم منها مش شاييفين قدمنا ..ماينفعش نقوم شبعان ..لأ ..نقوم متروسين
في حته كده مابين الغدا و العشا ماحدش بياخد باله منها ..اللي هيا اول ماتحس ان في خمسه جرام اتهضموا من الغدا و في مكان فضي في المعده ...جري علي التلاجه نفتحها و نلقط اسرع حاجه ممكن تتاكل.. تصبيره لحد العشا
يجي العشا (فيه ناس بتتعشي طبيخ ..احنا حانتكلم علي الناس اللي بقواهم العقليه) العشا نادر ما بيبقي فيه غباوه هما كام رغييف بلدي و جبنا و بيض و فول او علبه تونه و شويه عسل نحل (و زبادي بقي ..قال كده العشي بقا خيف خفيف ) ..كده خلاص تقريبا معظمنا بنوقف لحد هنا ..هو عموما المعده كفرت خلاص ..فيه ناس ربنا مديها قدرات خاصه انها تكمل بعد كده مالناش دعوه بيها احا بنتكلم عن عموم الناس..

* ينفع بقي يبقي دا نظام ناس دخلها متوسط ..طب ناس فقرا .. طب ناس خايفه علي صحتها طيب !!؟؟
* بحكم شغلي بشوف ناس اجانب (مش عارف ليه هما دايما اجانب ..بس دي الحقيقه) فطارهم ايه؟.. توست و كورواسون و بيضه ....و غداهم ايه؟؟!! بوله رز "يعني ملو فنجان " و طبق سلاطه كبير ..و ناس بتفطر و تتغدي كده حاتتعشي ايه يعني؟؟!!
* احنا مش بناكل لحد مانشبع ..احنا بناكل لحد ما الاكل يخلص "ماتتحركش من مكانك الا لما الطبق اللي قدامك يخلص"!!!!!!!!!!!
* ركزوا في كميه محلات و مطاعم الاكل اللي حوالينا (كتييييييييييير فشخ ) و كلها بتكسب ..طب الهايبرز اللي علي طول زحمه و السوبر ماركت الصغيره ...احنا استهلاكيين بشكل غبي و حانفضل كده لحد ما ثقافه "التلاجه لازم تفضل ممليه " دي تختفي
* صعبان عليا ان الفحت دا كلو يكون اخره شويه خرا في المجاري .."تعبنا طول اليوم بيروح هدر"

اصدقائي العيال :)

اصدقائي العيال :)))))))))


 اللي في KG 2 هذه نبذه ع رحله حياتك التعليمية...

   انتا حاتخش اولي ابتدائي عادي و كذلك تانيه ابتدائي بعد كده حايقلولك ركز بقي الي فات كوم و الي جاي كوم تاني !!!
تالته شهاده تمام ؟؟
حاتعدي بقي منها سواء جبت مجموع حلو ولا وحش (مجموع ايه انتا عندك اسمها درجات في الشهاده) و حايقلولك لاااااااا اللي جاي دا بقي اهم من اللي فات !!
اللي جاي خمسه او سته (علي حسب..!!.....انتا و وزير تعليمك) و دي شهاده بقي يا معلم شهاده كبيره مش زي بتاعت العيال دي اللي اسمها تالته
انتا بقي حاتسخن و تصدقهم عشان عيل و لسه صغير و مش متخيل انهم يكونوا مش فاهمين او مش عارفين او ماشيين علي عماهم..
سخنت يا معلم و عديتها تخش بقي علي التقيل (الاعداديه) انتا حاتبقي مخضوض شويه لان في عيال حاتلاقيها فردت كده و بقت هجمه ماتتخضش !!عاادي......ولو معاكو حد ساقط و عايد حاتلاقي عنده  شنب كده صغنن ....ولا كأنك شايف حاجه ركز مع
الصبوره.
المهم بقي اهلك حايبدئوها معاك بدري و يفضلو يكلموك عن الشهاده الاعداديه اللي هيا بقي ايه؟؟؟؟؟؟ تدخلك ثانويه عامه او تخليك عيل صايع من بتوع تجاري او صنايع!!!!(اللي انتا حاتضرب نفسك بالجزمه انك مادخلتهاش لما تكبر و تشوف الصنايعيه بيكسبو ازاي و انتا بتشحت واسطه بالمؤهل العالي بتاعك!!!)
المهم ....انتا حاتركز بقي في تالته اعدادي (فيه درس كده في العلوم كان دا هو قمه السكس علي ايامنا ...علي ايامك تقريبا انتا حايكون معاك موبايل فيه ميموري 8 جيجا و جاتقاطع المدرس و تصلحلو) ..
المهم عشان مانخرجش بره موضوعنا يا صايع انتا حاتشد في تالته اعدادي و تعملها و تجيب مجموع يدخلك ثانويه عامه و ياااااااااااااااااااه تفتكر بقي انها كده خلاص انتهت ..
لااااااااااااااا لا والله دي يادوب ابتدت ..انتا دخلت الفخ برجليك ..
غالبا حاتكون لسه تفكيرك محدود و بدون خبرات (طبيعي خالص مالوش علاقه بالتعليم اللي انتا اتعلمتو -او ماتعلمتوش- في الكام سنه اللي فاتو دا ليه علاقه بالسن و الخبرات الحياتيه) و تبقي عاوز حاجه من الاتنين مهندس او دكتور و لن ترضي بغيرهم بديل الباقيين كلهم ولود كلب ...
فا انتا حاتخش اما علم علوم او علم رياضه و حتاخد مواد ما انزل اله بها من سلطان و وارد جدا انك تجيب درجه وحشه في الفرانساوي و العربي و بسببها ماتعرفش تتدخل هندسه او حتي طب (ايه العلاقه؟؟ ماتسألش )و ممكن تحول ادبي في تالته بسبب الكمياء اللي انتا عمرك ما فكرت انك تخليها مجال مستقبلك !!!
تخلص تانيه ثانوي و لو انتا ظبطت الاداء حاتكمل تاتله في السليم و لو اتكعبلت حاتقوم جاري عي الادبي و اهلك بقي عاملين بحطو قدامك الاختيارات اللي انتا لازم توافق عليها و يجبروا بخاطرك و يساندوك معنويا و ان الامل لسه موجود و ان لسه الفرصه في ايديك  و ليه ؟؟ممكن تخش اقتصاد و علوم سياسيه او ألسن ..
واااااو انتا بقي حاتجيب اخرك و حاتذاكر مواد مش موجهه ناحيه حاجه معينه او كليه بعينها انتا منشن عليها ز
(من كل فيلم اغنيه !!!!! اقتصاد علي رياضه علي تاريخ علي علم نفس علي انجليزي علي كلوووووو و اديلوووووو)
المهم حاتعدي منها و انتا في احد الحالتين اما انك مرفوع الرأس منتصر او مهزوم شر هزيمه(او هكذا يبدو لك) لأن في نفس اللحظه دي اهلك حابيدأوا  بقي يلعبو معاك الدنيئه .
اللي هيا اييييييييييييييييه؟؟؟؟؟
ان ولا يهمك و ان الل( فات دا كوم و اللي جاي دا بقي كوم تاني خالص )..
فاكرها دي بتاعت فووووووووووووق و ان الي جاي بقي مستقبلك اللي بجد و اللي فات دا هزار .
و تخش بقي الكليه اللي هما يقلولك عليها الي هيا اعلي كليه في التنسيق اللي بيسمح بيها مجموعك) 
المهم تدخل الكليه مفشوخ انبهار بكل حاجه من اول البنات لحد ان مش طالبه معايا اخش امتحان الماده دي.
و تبدأ قال ايه تدرس مواد تؤهلك لسوق العمل وعشان تبقي عارف لا دي مواد و لا حاتؤهلك ولا فيه سوق عمل اصلا بس حاتعمل ايه حكم المضطر ..
ساقيه و اتربطت فيها خلاص
المهم حلتخلص بقي الكليه و انتا و شطارتك او فهلوتك و فيه احتمال انك لما تخلص تقف و تبص كده وراك و تقول هو ايه اللي حصل؟؟؟؟؟!!!!!؟.
تقوم تلاقي نفسك عندك 21 سنه و  15 سنه عدو عليك في هذا النظام التعليمي و انتا ولا فاهم اي حاجه في اي حاجه ولا عارف ايه اللي جابك هنا و ازاي يعملوا فيك كده ؟؟؟؟
و انك عشان تشتغل محتاج كورسات مش عارف ايه و سنترز تاكل عيش علي قفاك و تلاقي نفسك حتي مش عارف تسحبلهم واحده اسكندراني و تسألهم امال انا كنت بتعلم ايه طول السنين دي!!!

شويه ملاحيظ.

*اوعي تلوم علي الحاج و الحاجه هما كمان ضحايا نظام تعليمي فاشل و يمكن اسوأ و مكاتنش قدامهم غير كده بدليل ان هما كمان كعووا دم قلبهم في الدروس الخصوصيه و الكورسات و هما فعلا بيحبوك و كانو فاكرين انهما كده بيساعدوك.

* لا تجعل اليأس يسيطر عليك دي مش اول و اخر معاناه في حياتك لسه فيه كتير و مع الوقت حاتكتشف انو نظام بلد مش حد مستقصدك انتا .

*اخر حاجه...الجريمه اللي فوق دي لسه مستمره لحد دلوقتي   !!!

رساله الي الله

بسم الله..
حابدأ اكتب و مش عارفه حاكتب ايه..ممكن في اي لحظه ابطل كتابه و ماكملش  ..واللي حايجي في بالي حاكتبو زي ماهو ..الكلام دا انا قولتو في صلاوات و ادعيه كتير لربنا ..بس عاوزه اشوفه قدامي مكتوب.. حاحس براحه اكتر..مبدئيا انا مش زعلانه و مش خايفه  خالص..بالعكس..(مش زعلانه عشان اللي انا فيه دا نعمه الحمد لله و مش خايفه لان كلنا حانموت في الاخر).
لحد هنا انا ممكن اوقف كاتبه عشان رسالتي اللي جوايا خلاص ..حطتها بين قوسين قدامي بس حاسه بفرحه  وانا شايفه افكاري مرسومه بحروف قدامي :) عشان كده حاكمل...

انا مش زعلانه خالص يا رب..ازاي ازعل و اخاف اني رجعالك تاني !! دا انا المفروض اموت من الفرحه :) هو فيه حد حايحبني اكتر منك.. بالنسبه لموضوع شعري اللي وقع كلو و شكلي و انا رفيعه و جسمي الهمدان من اقل مجهود و نهجان صدري عشان بس اتوضيت و صليت ليك ..كل دي حاجات مفرحاني مش مزعلاني انا عارفه انك حاتعوضني بحاجات تخليني افرح باللي انا كنت فيه عشان كده انا فرحانه من دلوقتي و مش برضي اقول الكلام دا لحد عشان مايقولش اني بصبر روحي..و اشوف فعنيه نظره عطف انا مش محتاجاها بالعكس الناس هيا اللي محتاجه العطف دا مني.. و مش خايفه اني اموت علي الاقل انا مستعده..  انا بس زعلانه علي الناس اللي الدنيا واخداهم قوي و ناسيين ان احنا كده كده راجنعينلك و كل ماتيجي سيره الموت يكتئبوا و يزعلوا ؟؟!!يمكن عشان الشيوخ بيخوفوهم من موضوع الموت دا ..بس ازاي شيخ وظيفته انو يخلي الناس تؤمن بالدين و تحب ربنا و بعد مايؤمنوا يخوفهم كده ! امال الكفار حايتعمل فيهم ايه!!! ولا موضوع الناس اللي بيموتوا بعض..عشان خاطر واحد مسؤل كبير في  اي البلد اخد قرار يروح باعت الجيش بتاعو يحارب جيش تاني تقوم قايمه حرب و العساكر تموت بعض و هيا ولافاهمه حاجه!!!بجد صعبانين عليا :(
, انا حاسه اني خلاص كلامي قرب يخلص مني ...

انا خلاص خلصت كلامي و مش عاوزه اقول حاجه تاني لاي حد  انتا بس الي عارف سري حتي رضا بتاع كل يوم 6 و 20 في الشهر ماحتكتلوش الكلام دا .. سلام